ଆଲିଗଡ଼ ରାଲିରେ ଯୋଗୀଙ୍କୁ ପ୍ରଶଂସା କଲେ ମୋଦୀ , ‘ତାଙ୍କୁ ଯିଏ ବୁଲଡୋଜର ସହ…’

ନୂଆଦିଲ୍ଲୀ : ଉତ୍ତରପ୍ରଦେଶରେ ବିକାଶ ଆଣିବା କାରଣ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଭୂୟଶୀ ପ୍ରଶଂସା କରିଛନ୍ତି। ଆଲିଗଡ଼ରେ ଏକ ନିର୍ବାଚନ ରାଲିରେ ଉଦବୋଧନ ଦେଇ ମୋଦୀ କହିଛନ୍ତି, ବିଜେପି ପାଇଁ ଆମ ଉତ୍ତରପ୍ରଦେଶ ଆଜି ‘ଆତ୍ମନିର୍ଭର ଭାରତ- ଆତ୍ମନିର୍ଭର ସେନା’ରେ ପରିଣତ ହୋଇଛି । ମୋଦୀ କହିଛନ୍ତି, ଯୋଗୀ ଆଦିତ୍ୟନାଥଙ୍କୁ ଯେଉଁମାନେ ବୁଲଡୋଜର ଦ୍ବାରା ଚିହ୍ନିଛନ୍ତି ସେମାନଙ୍କୁ ମୁଁ ଏହା କହିବାକୁ ଚାହେ ଯେ ଯୋଗୀ ସରକାର ଦ୍ବାରା ହୋଇଥିବା ଶିଳ୍ପ କାର୍ଯ୍ୟ ସ୍ବାଧୀନତା ପରଠାରୁ କେବେ କାହାଦ୍ବାରା ହୋଇନଥିଲା। ଯୋଗୀଙ୍କ ପରି ମୁଖ୍ୟମନ୍ତ୍ରୀ ପାଇ ମୁଁ ଖୁବ୍ ଗର୍ବିତ ବୋଲି ସେ କହିଛନ୍ତି। ‘ଗୋଟିଏ ଜିଲ୍ଲା , ଗୋଟିଏ ଉତ୍ପାଦ’ ଭଳି ତାଙ୍କର ମିସନ୍ ସାରା ଦେଶରେ ଏକ ନୂଆ ସମ୍ମାନ ସୃଷ୍ଟି କରିଛି। କାଶିର ଜଣେ ସାଂସଦ ଭାବେ ସେ ମଧ୍ୟ ମୋର ମୁଖ୍ୟମନ୍ତ୍ରୀ। ଏଭଳି ସହକର୍ମୀ ପାଇ ମୁଁ ଖୁବ୍ ଗର୍ବିତ ବୋଲି ପ୍ରଧାନମନ୍ତ୍ରୀ କହିଛନ୍ତି। ମୋଦୀଙ୍କର ଏହି କାର୍ଯ୍ୟକ୍ରମରେ ଯୋଗୀ ଆଦିତ୍ୟନାଥ ଏବଂ ଅନ୍ୟ ବିଜେପିନେତାମାନେ ମଧ୍ୟ ଯୋଗ ଦେଇଥିଲେ। ମୋଦୀ କହିଛନ୍ତି, ଏବେ ଭାରତକୁ ଦୁର୍ନୀତିମୁକ୍ତ ଏବଂ ବଂଶବାଦ ରାଜନୀତିରୁ ମୁକ୍ତ କରିବାର ସମୟ ଆସିଛି ଏବଂ ଏହି କାରଣ ପାଇଁ ଏବେ ଆମକୁ ଭୋଟ୍ ଦେବା ଗୁରୁତ୍ବପୂର୍ଣ୍ଣ। ଉଲ୍ଲେଖଯୋଗ୍ୟ ଯେ ଆସନ୍ତା ଏପ୍ରିଲ ୨୬ ତାରିଖରେ ଆଲିଗଡ଼ରେ ନିର୍ବାଚନ ଅଛି।